袋巾傑拒湯同行
大狀黨派出黨魁梁家傑（袋巾傑）同法律界議員郭榮鏗見林鄭，袋巾傑話，今次會面更加確定港人唔應該對中央有任何幻想。下星期日泛民會先發動新一波動員，叫「泛民反拖住先行動」，抗衡政府下星期六發動嘅「袋住先」攻勢。
今次會面仲有小插曲。八卦友話畀我哋聽，袋巾傑黨友、溫和派代表湯家驊本來都話想參加，不過袋巾傑就話，唔駛咁多人去招呼林鄭。之後湯家驊再問多次可唔可以去，但係袋巾傑就始終冇回覆，至此湯家驊亦好識趣，冇再追問落去。聽講當電視直播袋巾傑同傳媒講述會面情況時，湯家驊啱啱喺立法會餐廳食晏，有人形容湯家驊當時苦笑咗一吓喎！