政情：仁辭等公投 趕唔上區選

推高投票率成疑

據聞AV仁辭職引發公投一事已成為泛民「五方會談」嘅焦點議題，有人建議佢應該喺政改表決前辭職，但亦有人話現時辭職時間太緊迫，未必可以喺表決前完成補選，顯示唔到民意傾向，所以有人就建議應喺否決政改後辭職，「公投」時間便同年底區議會選舉相當接近，泛民亦可以藉發動公投炒熱選舉氣氛，甚至推高投票率。因為以往區議會選舉，投票率偏低，而泛民相信投票率愈高，對佢哋愈有利。

泛民來勢洶洶，政府又點拆彈呢？聽聞政府胸有成竹，因為超級區議員辭職引發補選，等同一次大型全港選舉。就算壓縮所有程序，由辭職到補選最快都需時四個月。假如AV仁喺七月辭職，即係話補選同區議會選舉撞正同一個月。但政府已為區選抽調大批公務員協助點票，又借用學校及社區會堂作點票中心。若同日再舉行補選，即係話要抽調雙倍人手，根本無可能。

難抽調人手點票

咁有冇可能喺同一個月嘅唔同日子舉行？政府消息人士就話，選舉通常喺星期日舉行，若現時向學校同社區中心申請借場，可能最快都要到十二月底至有場，但屆時適逢聖誕及元旦假期，政府又難以抽調人手點票，所以分分鐘要過埋農曆新年嘅長假期。數吓數吓，最快都係明年三月喇！所以政府預料AV仁辭職公投呢單嘢分分鐘搞唔成。咁政府預留兩億元用嚟搞補選咪無用武之處？唔怕，立法會主席曾鈺成話唔排除辭職以便護送政改過關，若然係咁，到時都係要搞補選，咁咪啱啱好囉！