中環出更：畫作變頸鏈 靳叔送愛妻
博物館有各式各樣嘅收藏品，部分具有相當價值，好多人都想擁有其中一、兩件。最近七位本地著名設計師將部分館藏注入新元素，並設計成多款紀念品，市民參觀完仲可以買番屋企留念。有「香港設計之父」之稱嘅靳埭強（靳叔）亦有參與今次活動，佢將過去嘅作品加入首飾意念，令一幅畫變成頸鏈，仲準備送畀太太添，認真有心思。
靳叔話，最初係因為一片銀杏葉飄落地下，觸發咗佢畫呢幅畫嘅靈感。後來佢將首飾意念加入畫中，咁啱又搵到一粒玉石作配襯，於是就將幅畫變成一條可以戴得嘅頸鏈，展覽結束後就會送畀太太。
重遇擦火花 譜師生戀曲
原來靳太係靳叔嘅「粉絲」，曾同佢學畫畫，後來兩人重逢擦出愛火花。靳叔笑稱太太好支持佢創作，相信今次送條自創嘅頸鏈畀佢，佢實好鍾意。
現場仲有經典兒童刊物《兒童樂園》嘅人物或場景製成嘅襟章，例如成班小朋友轉呼拉圈、捉蝴蝶及放炮仗等，充滿昔日簡樸生活嘅情懷，呢啲係設計師區德誠（Benny）嘅大作。Benny話，《兒童樂園》係好多人嘅童年回憶，希望市民欣賞完展品可以將快樂感覺帶回家。
本地著名視覺藝術家「又一山人」黃炳培亦有份參與，並將一百幾年前水務署喺街頭髹上啲屋形標記，融入領帶、圍巾及袖口扣等設計，佢話呢個標記係顯示水管資料，依家仍隨處可見，係港人集體回憶，再配上「WE LOVE HK」字樣，令設計充滿本土色彩。
卓妮