俗語話，平生不做虧心事，半夜敲門也不驚。一個人行得正企得正，問心無愧，自然乜都唔使驚；相反，如果做咗虧心事，心中有鬼，必定係杯弓蛇影，草木皆兵，惶惶不可終日。
話說本港示威活動愈來愈頻密，愈來愈暴力，尤其係舊年嘅佔領行動更搞到七國咁亂，幾乎令香港萬劫不復。警方吸取裝備不足嘅教訓，計劃購買三部水炮車以作不時之需，本來好正常啫，其他先進國家早就擁有相關設備。點知反對派好似被踩到條尾咁，竟然群起攻之，有人話水炮車係用來打壓言論自由，有人指水炮車有殺傷力，有人甚至將水炮車形容為生化武器；有位所謂工程師仲煞有介事計算一番，得出嘅結論係，水炮喺五米距離可以製造三百幾磅衝擊力，好似一個人被車撞向牆一樣，後果可大可小喎。
咁就好笑嘞，水炮有殺傷力，唔通警槍及警棍冇殺傷力？根據反對派嘅邏輯，警員豈不是任何裝備都唔准帶，只能赤手空拳執法？尤其係警槍，唔止有殺傷力，而且隨時可以殺人添。仲有吖，反對派喺佔領行動中手持雨傘，咪一樣有殺傷力，咁又點解釋吖？唔通只准佢哋犯法，唔准警方執法？
正如警務處處長曾偉雄質疑，如果警方唔准買水炮車，又唔准用警棍或催淚煙，大家係咪希望警方「翹埋雙手」。冇錯嘞，呢個正正係重點，反對派就係希望警方翹埋雙手，任得佢哋搞亂香港。如果係良好市民，根本唔使擔心警方購買乜嘢裝備，只有牛鬼蛇神先至會杯弓蛇影，連水炮車都視為洪水猛獸。正所謂，無私顯見私，反對派愈係反對警方購買水炮車，愈證明佢哋心術不正，心中有鬼。
係人都知，無論警槍及警棍，或者催淚彈及水炮車，都係現代警隊正常嘅裝備，任何國家及地區都唔例外，唯獨喺香港，連購買三部水炮車都引起咁大爭議，反對派上綱上線，簡直九唔搭八。有人話，香港愈來愈似妖獸都市，真係一啲都冇誇張。
講來講去，反對派始終都係擔心警方用水炮車對付佢哋啫。舊年佔領行動以失敗告終，幕後黑手死心不息，隨時準備捲土重來，尤其係政改方案即將出爐，有人揚言要重新佔領，有人甚至威脅會發動暴力抗爭，一場新嘅風暴一觸即發，到時萬一場面失控，警方出動水炮車一啲都唔出奇，唔怪得反對派咁驚青喇。計功夫茶話齋，淨係反對警方購買水炮車唔夠，不如連消防車都取消埋，事關消防車都有殺傷力吖！