政情：中出未確定 明年立會代表人選
立法會選舉明年就舉行，各黨各派正積極部署，連帶功能界別都物色代表參選，但進出口界議席仍未定到人選。中華出入口商會（中出）副會長兼秘書長陳勁話，無論係後生或老年嘅會員都有意服務社會，亦希望多啲人加入議會為業界發聲，但重申一切都要考慮大局，明年先可以敲定。佢強調，無論係商界或政黨背景嘅代表，只要係進出口界立法會議員，當有意見分歧時就一定要以業界利益行先。
力撐「一周一行」
內地當局本周一正式宣布收緊深圳戶籍居民「一簽多行」政策，改為「一周一行」，正當零售業叫苦連天之際，中出卻力撐有關政策。中出會長張學修話，過往入口貨受到水貨衝擊，商家對入口貨物嘅意欲大減，依家嚴打水貨客，反而令到深圳對香港貨物嘅需求增加，貨物可從正常途徑入口，對行業有正面影響。
另外，中出將會舉辦第二屆進出口企業大獎，該會常務會董彭楚夫話，今年規模比去年大一倍，希望藉此吸引內地及國際企業參加，成為中出嘅品牌同重點項目。