政情：橄欖擲70萬購美國電跑
上星期股市升到嘭嘭聲，唔少股民都豬籠入水，有人仲聲稱賺到買樓首期添！卓妮發現立法會議員陳鑑林（橄欖）最近豪擲七十幾萬元買咗部美國新款電動跑車，莫非佢喺股市中獲利，所以買車獎勵自己？橄欖就話，半年前已經睇中呢部車，計番時間應該唔關股票事，但等呢架車就等到頸都長。
肥老闆請食飯無上限
橄欖部新車同依家好多房車一樣，唔需要撻匙就可以啟動摩打，行駛嘅時候亦非常寧靜，而且充一次電就可以揸一星期，論性能表現佢相當滿意，唔怪得去年十月時已經一見鍾情。雖然橄欖強調新車符合環保潮流，但就可能因為叉電而大大提高屋企嘅電費，佢話等電費單寄到屋企先知道可以慳番幾多油錢。
另外，金融服務界議員張華峰（肥老闆）上星期亦憑港交所股票賺到笑，據聞唔少建制派議員都要佢請食飯，而且反應非常踴躍，大家都爭住報名。肥老闆亦好闊佬，話餐飯嘅資金冇上限，但就要由漁農界議員何俊賢搞掂喎，咁何俊賢記得柯打定「排翅撈飯」畀肥老闆嘞！