政情：黃浩銘邀樹根「濕吓身」
警方喺本年度財政預算案中提出添置三架水炮車，唔少建制派議員都表示支持，議員鍾樹根更加喺早前嘅保安事務委員會力撐要買多幾架添，仲話「水炮最好，濕吓身之嘛」，結果言論被泛民主派狠批。社民連副主席黃浩銘尋日仲向樹根公開下戰書，話自己「捨命陪君子」，要求同樹根一齊「濕吓身」，測試水炮車嘅威力，希望樹根「唔好龜縮」，接受挑戰喎。
鍾：唔得閒同佢玩
黃浩銘話，如果樹根願意同佢一齊企喺距離水炮車十五米內，被開盡馬力嘅水炮車射頭、身、腳三個部分，而又無受傷，佢就會游說社民連喺立法會支持購買水炮車。由於依家香港仲未有水炮車，佢建議用消防車測試，仲豪語「大丈夫，講過就算數」。唔少網上評論都表示好想睇到樹根濕身，但睇嚟網民要失望喇，事關樹根似乎無心應戰。
樹根叫我哋同黃浩銘講，「無咁得閒同佢（黃浩銘）玩」，又問點解要定喺十五米而唔係五十米，強調水炮車一定唔會咁近距離射向市民，指黃浩銘係激進泛民，但「又要威又要帶頭盔，不可理喻」。
樹根繼續發炮話：「我都無犯法，點解要被水炮車射呢？犯罪嘅人就預咗喇，驚就唔好出嚟，真正搞革命嘅人連真槍實彈都唔怕o架！」