政情：退聯公投疑遭打壓
佔領行動發生之後，學聯因為決策失誤而盡失民心，唔少大專學生都高呼退出學聯。繼香港大學同嶺南大學之後，理工大學尋日亦就退聯議案舉行全校學生公投，而城市大學同浸會大學嘅公投亦會喺下周舉行。有消息指，唔同大學嘅學生會對於退聯公投多番阻撓，有啲縮短投票時間，有啲就揀無人返學嘅日子投票，有啲就用「黑底黑字」印海報，博同學見唔到，種種「打壓」都反映退聯公投動搖學聯威信，令人覺得學聯「使橫手」防止港大退聯事件重演。
關注組批「下三濫手段」
理大尋日舉行退聯公投，按照會章，要有一千八百個學生會會員參與投票，同時贊成票過半，學生會先可以成功退聯。退聯關注組發起人陳浩天批評，學生會內部運作拖延，令到投票到學期尾先可以開始進行，而七日嘅投票日中，有五日係自修日，根本無人返學，佢擔心人流太少，投票率不足，令投票無效。問到學生會故意揀自修日搞公投，係咪有心打壓？陳浩天話，一般投票只得五日，經過爭取之後學生會同意今次投票延長至七日，「都好過無」。
原來城大退聯投票亦爆出打壓傳聞，城大退聯關注組前日喺社交網站批評，學生會以「下三濫手段」打壓退聯投票，怒斥學生會用「黑底黑字」印製宣傳退聯嘅投票海報，令同學根本睇唔到有關退聯投票詳情。城大學生會回應話，已經收到同學意見，話會改善喎。
泛民五方平台一盤散沙
除咗大專生，有傳泛民主派對於學聯嘅同學仔都好不滿。由佔中三子、雙學、泛民同民間團體組成嘅五方平台前日開會，據了解，泛民同雙學就民主黨（白鴿黨）立法會議員何俊仁辭職搞變相公投一事「傾唔埋欄」。由於辭職公投需要投入大量人力物力，白鴿黨要求五方各派人幫手，但學民思潮就拒絕派出人手，而學聯又拒絕出錢，搞到白鴿黨人好不滿。記得喺佔領行動期間，雙學一直主張辭職公投，依家又唔支持白鴿黨搞，反映五方平台各懷鬼胎，成盤散沙。