中環出更：品牌局誓省番靚港招牌
本港零售市道淡靜，剛於四月一日履新嘅香港品牌發展局一班理事會成員尋日聚頭，探討救亡大計。新任主席黃家和話，品牌局內匯聚唔同業界翹楚，所以可以針對唔同行業面對嘅問題提供意見，佢哋開會後決定成立六個唔同嘅行業委員會，誓要合力省番靚香港招牌咁話。
兩理事姓名讀音一樣
今屆副主席沈運龍、吳清煥及陳國民都有到場。而新一屆品牌局成員，多咗唔少新理事加入，其中有兩個理事嘅姓名讀音一模一樣，就係做地產代理高層嘅黃偉雄，同埋做零食生意嘅黃偉鴻。黃偉雄笑言，唔係第一次同人撞名，所以早已經習慣咗。佢仲好幽默話，呢個唔係佢嘅煩惱，反而想叫佢名嘅人煩啲喎！
卓妮