環保係世界潮流，屋頂綠化更成為一種趨勢，港府亦唔執輸，近年有樣學樣大搞屋頂綠化，而且不惜工本添。可惜吖，港產官僚做嘢一向求求其其，敷衍了事，搞咗咁多年究竟有幾多成效，佢哋居然矇查查，問你服未。
話說港府為咗趕時髦，過去三年斥資近一億四千萬元，為大約一百幢政府建築物做屋頂綠化工程，聲稱可以為樓宇隔熱，減少熱島效應，提高能源效益喎。即係咁，屋頂綠化係大勢所趨，為咗環保，使錢唔係問題，最令人質疑嘅係，當局以難以量化為藉口，一直拒絕檢討成效，咁就有蠱惑喇。
呢，本報記者巡視過多幢做咗屋頂綠化嘅政府建築物，發現問題多多，部分綠化覆蓋率極低，部分求其擺放幾個盆栽就算綠化，純粹得啖笑。好似荃灣雅麗珊社區中心、荃灣一間官立小學、維多利亞公園游泳池同埋沙田一間官立中學咁吖，綠化面積僅佔天台五分之一，有啲連盆栽都計埋添；而聲稱已完成綠化工程嘅旺角水渠道垃圾收集站，更係一片泥濘。
建築署點樣解畫呢？佢哋話喎，每個建築項目嘅綠化設計唔同，綠化效果亦會因應季節及植物生長而有差異，所以好難量化。嗱，呢啲咪就係死撐囉，外國早有科學方法測量及評估屋頂綠化嘅效益，港府一味耍官腔，如果唔係卸責，就係幼稚無知。正如學者話齋，香港屋頂綠化屬於低層次水平，同德國、日本等先進國家比，最少落後十年，德國嘅屋頂綠化已經係大學級，而香港就停留喺幼稚園階段，簡直羞家。
其實，香港同樣有大把人才，淨係港大地理系講座教授詹志勇咋，過去就發表咗二十幾篇關於屋頂綠化嘅文章，屢獲國際獎項，如果港府肯聽吓專家意見，又點會搞成咁吖。詹志勇指出，做得好嘅屋頂，可以令受到陽光猛烈照射嘅天台降溫二十至三十度，節省大量能源；相反，做得差嘅屋頂，會為天台加溫。好明顯，港府屋頂綠化搞到唔湯唔水，唔止唔可以提高能源效益，直情係浪費公帑，弄巧反拙。
事實證明，屋頂綠化嘅效益唔係唔可以量化，而係港產官僚唔化，佢哋一向得把口環保，唔係雷大雨小，就係虎頭蛇尾，唔怪得搞來搞去得個吉。環保團體促請港府訂立具體目標，再做短、中及長期規劃，否則屋頂綠化只會紙上談兵。冇錯嘞，日本東京十幾年前已規定所有新建築物必須做屋頂綠化，反觀港府求求其其，做啲唔做啲，咁又點可能成功呢？