政情：「新政」美女話唔諗拍拖住
佔領行動後成立嘅新組織「青年新政」，早前派出靚女OL游蕙禎化身社區主任，準備挑戰身兼九龍城黃埔東區議員嘅九龍西立法會議員梁美芬。阿禎憑着甜美外貌，成功吸引唔少網民，但佢就話唔傾向「造神」，暫時亦唔諗拍拖住，只希望專注於社區工作。唔知一眾男網民會否好失望呢？
阿禎畢業於嶺南大學中文系，本來只係諗住做個平凡OL，但後來參加過兩次同區議會有關嘅活動後產生興趣，佢相信冇泛民主派勢力滲透在內後便毅然加入。阿禎話，佢稱得上係「政治素人」，所以冇包袱，可以一心一意服務街坊。
不過，自從青年新政曝光後，好多人都開始注意阿禎，甚至佢同朋友嘅合照都被人擺上網品評，佢惟有停止社交網站帳戶，「出得嚟都預咗，但依家覺得冇嘢，慢慢會習慣」。