政情：「飛仔」追女難 波波靠堅持
發展局局長陳茂波（波波）尋日去到位於深水埗嘅美荷樓，同一群學生分享經歷。波波話細個住木屋，家庭環境唔好，所以好畀心機讀書，希望改善屋企人生活。不過，最令佢體會到堅持嘅並唔係刻苦挑燈夜讀，反而係追女仔嘅時候。
波波話，升上大學之後，對同一大學嘅師妹、現時太太許步明（Frieda）一見傾心，所以就追住佢唔放。戀情穩定之後，Frieda就帶波波返屋企見家長，當時波波頭髮長長，十足飛仔一樣，再加上佢係潮州人，有啲人話「潮州人打老婆」，Frieda媽媽對佢印象唔多好，唔想佢哋繼續交往。
「跟得」男友 搬屋照跟
不過，當時嘅波波無理Frieda媽媽反對，唔單止日日接放工，連Frieda由深水埗搬去薄扶林，佢都跟住搬，最終抱得美人歸。佢用呢件事寄語同學仔，人生路上總有啲人唔太接納自己，但如果係真心所求，就要全力以赴、矢志不渝。