泛民主派發起不合作運動，成功突擊取得立法會工務小組委員會同人事編制小組委員會嘅控制權，即使建制派補飛申請逾期加入都為時已晚。
同樣有提出逾期加入人事編制小組嘅議員蔣麗芸（Ann），尋日就現身人事編制小組特別會議，但佢就唔係為加入小組親身到場拉票，而係鬧爆泛民一錯再錯、低效率、浪費公帑兼對唔住納稅人。阿Ann仲憤然撤銷申請以示不滿！
每次兩個小組委員會處理建制派議員逾期加入申請時，泛民都對申請人諸多留難兼玩批鬥，近期建制派議員都不甘受辱，冇再出席有關特別會議。阿Ann尋日就喺會議上話，過往建制派都係一半人加入工務小組、一半人加入人事編制小組，估唔到泛民今次背信棄義，佢先申請逾期加入。佢又批評，建制派去年十月已申請加入小組，點知至今都未審理完，直斥泛民玩嘢係「一錯再錯」。
阿Ann意猶未盡，話去年度同期嘅人事編制小組已開咗九次會、處理廿二個決議，本年度開十三次會先批咗七個，直言對小組主席梁繼昌的領導感到失望，所以要撤回逾期加入申請。