政情：乳鴿盲反三跑 自揭逆民意
行政會議拍板通過機場興建第三條跑道（三跑），引發民主黨（白鴿黨）老、嫩鴿內訌，老鴿立法會議員單仲偕（騸雞）因公開支持興建三跑而被黨內激進乳鴿怒插，其中南區區議員柴文瀚仲發起聯署反對，近日仲做埋三跑民調，同騸雞唱反調。不過，包括柴文瀚在內嘅乳鴿尋日公布民調結果，發現民調同乳鴿嘅反對立場大相逕庭，似幫自己倒米多啲，最搞笑係連柴文瀚都話係咪企硬反對都要再睇長遠啲先喎！
近半受訪者：需擴航運量
白鴿黨就興建三跑喺本月初訪問咗八百多名市民，民調結果顯示四成九受訪者認為香港機場嘅航運量需要加大，認為唔需要嘅就有四成一。同時有五成六人唔擔心三跑會污染水質及對中華白海豚棲息地造成威脅，六成三人甚至唔同意由立法會把關決定係咪興建三跑。
被問到係咪支持要用一千四百億元興建三跑，反對同支持嘅分別有五成二同四成二人，而假設政府保證唔到三跑計劃可提升航班升降量目標情況下，反對同支持起三跑嘅就分別有五成半同四成二人。雖然反對興建三跑嘅受訪者勉強佔過半數，但被問到政府應否提出興建第二個機場方案畀市民參考，有四成六人覺得並非必要，認為必要嘅只有三成九，而在眾多增加目前機場跑道容量嘅方式中，興建三跑係最多人選擇嘅方法。
柴文瀚縮沙 「要睇長遠啲」
面對咁嘅民意結果，柴文瀚都冇再怒插騸雞，只係話見唔到民意好支持興建三跑，當局應該喺融資、空域、環保等問題上提供多啲資料畀公眾，至於係咪企硬反對，佢就話呢一刻民意唔清晰，要再睇長遠啲先喎。而白鴿黨副主席羅健熙就繼續死撐，話民意唔係好支持興建三跑，仲有好多問題未解決，都係要解決咗先考慮。
對於騸雞之前被乳鴿怒插，尋日都有出席民調記者會嘅白鴿黨立法會議員胡志偉就話，其實騸雞嘅發言已經好清楚提出，佢會去睇有關三跑嘅問題係咪有合理解決，其實呢個都係該黨一直嘅立場，胡志偉似乎都想平息呢場風波。不過，如果該黨就三跑問題上係咁尊重民意嘅話，咁佢哋又會唔會同樣尊重民意，對政改「袋住先」呢？