中環出更：馮檢基涉撞李慧琼座駕 不顧而去

馮檢基接受查詢時大呻「冤枉」，指尋日大約下午三時，佢駕駛座駕返回立法會大樓，並將車輛停泊在李慧琼座駕的左方，當時不為意是否撞到其他車輛，隨即返回辦公室。不足一小時後，佢收到立法會保安聯絡，指民建聯立法會議員蔣麗芸的司機可作證，投訴佢嘅座駕曾撞花李慧琼嘅座駕。

馮檢基即時抵達車場視察，發現李慧琼嘅座駕左前方的確「花咗」，但佢形容損毀地方「只得半個指甲位」，馮不服氣，要求保安翻查閉路電視錄影帶，由於角度問題，錄影帶只看見馮倒車，但未有看見馮的座駕有否撞向李慧琼嘅座駕。

稱冇撞到 卻「賠住錢先」

馮檢基同蔣麗芸司機理論期間，李慧琼嘅丈夫到場，後來調解成功，同意馮檢基「賠住先」，向李賠償四千元。馮檢基多次強調並無撞向李慧琼座駕，又指若兩車有碰撞，「撞到應該有響聲，但我架車又無花。」卓妮截稿前仍未能聯絡上李慧琼回應事件。

卓妮