中環出更：巾幗能抵「礦」 工字也出頭
做工業不想被淘汰，就要不斷升級轉型。香港青年工業家協會（協會）一眾骨幹尋日齊現身，為佢哋負責籌辦嘅香港工商業獎升級轉型獎項搞宣傳騷。身兼協會副會長嘅利記集團第三代女當家陳婉珊（Clara）分享做工業嘅點滴時話，女性仍未得到平等嘅對待，好似佢落礦場時，經常要着大幾個碼嘅男裝安全衣及帽，有啲國家甚至仍禁止女性入礦場添！
女性做工業本身已罕有，更何況係畀人印象辛苦又污糟嘅礦業。Clara話，佢入行頭五年內心非常掙扎，因為容易被男性質疑工作能力，為咗爭取認同，無論係落礦場或視察高溫嘅金屬製作工場，佢都堅持親力親為。佢嘅努力最終有成果，原本係五金廢料回收商嘅利記，如今已成功轉型為亞洲最大嘅有色金屬供應商之一。不過Clara感嘆話，有啲地方依然好迷信，包括澳洲、加拿大都有礦場拒絕女性內進。
嚴志明印度開廠「大開眼界」
協會會長嚴志明（Eric）、副會長廖錦興及張益麟都有出席，張益麟分享透過改善公司網絡系統，成功提高生產效益而度過低潮期嘅經驗，廖錦興就話，升級轉型唔係做一次半次，而係每隔一段時間都要做。做傢俬製造嘅Eric亦係不停升級轉型嘅樣辦，近年轉戰印度開廠。講到印度嘅工作文化同香港嘅差異，Eric話，當地經常塞車，所以啲人返工遲到成個鐘都覺得合理。仲有當地人理解喺年頭係一至六月，Eric笑稱好長時間先摸索到大家嘅溝通方式。
卓妮