李光耀逝世，各國政要對其致哀，除了稱他是歷史巨人、戰略家外，更常見的是稱他是一個「偉大的政治家」。然而，李光耀生前曾說他左右不了別人如何看待他，但不希望以政治家的身份被人銘記。他說：「我認為自己是一個意志堅定、始終如一、堅持不懈的人，我腳踏實地地做事。我會堅持不懈，直至成功……」
老朽忽然又閃起前特首曾蔭權爵士，呢位「貪遍省港澳，歎盡海陸空」嘅貪曾，○五年佢參選特首時，報稱職業為「政治家」，其時，全城為他的厚顏而汗顏，今天許多人都覺得佢「實至名歸」，佢至叻吹水，更叻把英國撤出前必留下一堆蘇州屎發揚光大，佢係給「繼任人」埋地雷……呢啲地雷爆完一個又一個，乜嘢國民教育爭議、新界東北發展計劃、放寬個人遊、置安心計劃……ＣＹ拆彈拆到氣咳，香港至今無日安寧，政改爭拗、社會撕裂、中港矛盾、民怨爆煲，總之，管治難上加難，貪曾呢位「政治家」都咪話唔犀利！更厲害嘅係佢孭住「爵士」呢個名銜，搞到連反貪利器嘅廉署，對佢都好似畏首畏尾，查咗逾三年，依然落得「好快好快」而實際「不見人下來」嘅禪家境界，對呢位「爵士政治家」，老朽想唔服都唔得！
在中國，向來談政治都不是輕鬆的一件事，周厲王時有所謂「道路以目」，近啲嘅有老舍《茶館》裏嘅「莫談國是」。老朽倒愛孫中山對「政治」嘅闡釋，佢話「政就是眾人之事，治就是管理，管理眾人之事就是政治」。政治其實亦「平易近人」。
李光耀唔想以政治家身份被人銘記，可是，佢嘅標誌係將他所領導嘅社會，從其所處位置帶到其所不曾達到嘅位置，而貪曾標誌卻是令香港廉潔蒙污，其「職業政治家」生涯，值得所有熱愛從政者深思反省。