現時網購咁方便，幾乎任何類型嘅物品都可以喺網上買到。原來中華廠商聯合會會長李秀恒（Eddy）及品牌局候任主席黃家和都係「網購達人」，仲有唔少專業用家心得添！不時上網買相機及相關用品嘅Eddy教路，唔同信用卡手續費有平有貴，而每次付款都有上限，購物超過二千元就要留意喇。Eddy又講笑話，最唔明白係每次網購嘅貨物包裝都係封滿晒麈，好在內裏貨品乾淨啫。
至於黃家和網購仲誇張，鍾意買大大件家具，好似梳化咁，但佢就唔係透過內地平台買，而係喺法國網購。講開品牌局嚟緊六月會喺天津舉行嘅「天津香港品牌節」，現任品牌局主席陳淑玲話，內地客來港掃貨都係因為對港貨品質有信心，既然內地對呢方面有需求，展覽會係一個好機會讓佢哋認識更多唔同類型嘅香港品牌。至於網購咁普遍及方便，佢亦唔排除將來可以移師至網上舉辦品牌節，滲透率有機會更高。