政情：中大法律生 搖身變警花
香港真離奇，有大學法律教授同資深大律師公然帶領群眾犯法，破壞法治，但喺中文大學法律系畢業的靚女新紥師姐陳欣彤（Jessica），就放棄做律師投考警隊，以另一種身份維護法治。警察學院尋日舉行新一屆結業會操，Jessica喺嘉賓手上接過象徵最高畢業榮譽嘅「施禮榮盾」，以「最佳結業督察」資格畢業。Jessica將派駐葵涌警區，大家得閒留意吓喇！
體能較弱 狂操惡補
Jessica透露，去年中大法律系畢業後，媽咪好想佢舒舒服服做律師，但佢為人好動、鍾意接觸不同事物，於是去投考警隊，好彩最後都得到雙親支持。讀法律出身對刑法規例當然較熟悉，但佢體能方面就較弱，惟有投考前「惡補」不停練跑。入到學堂之後，佢試過連續跑山訓練四小時後，雙腳痛足成個星期，連行樓梯亦有困難，真是聞者心痛。
對於佔領行動令警民關係緊張，Jessica話會應用喺學堂學到嘅技巧依法辦事，就唔會有問題。翻查中大刊物，我哋發現Jessica跟過曾任警員嘅知名「藍絲」律師陳永良實習，不知呢個係咪她最終棄律師從警嘅觸發點呢？