政情：公民講場：政改樂觀派 孫公又出船

泛民主派立法會議員綑綁式堅決反對人大「八三一」框架下嘅政改方案，令政改通過機會似乎好渺茫。不過，喺官場浮沉多年嘅教育局前局長孫明揚尋日接受電視訪問時，就話「船到橋頭自然直」，相信泛民會係大是大非下決心轉身喎！其實「船到橋頭自然直」可以話係孫公嘅慣常用語，去年七月佢已就政改困局講過呢句話；而佢退休前回顧任內最艱巨嘅縮班政策時，又係講同一句說話，所以某程度反映孫公做人態度都係樂觀嘅。