政情：花甲長毛死頂
泛民主派經常玩分裂，造成黨內青黃不接，成立八年多嘅社民連（社記）亦唔例外。社記係香港第一個旗幟鮮明嘅激進泛民，惟經歷過一次又一次嘅內訌分裂，該黨近年已人丁單薄；加上受到去年佔領行動影響，社記似乎已經數唔上係最激進嘅一群，搞到定位非常尷尬，亦流失咗一班支持者。面對種種危機，明年踏入花甲之年嘅社記主席梁國雄（長毛），分分鐘要再次披甲上陣參選立法會。
區選僅派出四人
佔領行動後，新冒起嘅政團有如雨後春筍，唔少更打着激進、勇武嘅旗號，例如帶領一班人衝擊立法會及發起連串反水貨客行動。相比之下，社記就大為失色，喺上述行動中進退失據，更惹來批評，話佢哋老餅、唔夠激進，好多年輕人都唔願意加入，令該黨缺乏新血。既然冇新血，擔子就落喺一班舊人身上。
新一屆區議會選舉喺十一月舉行，據聞社記只能派出四人出選，其中兩人更係過去選舉中屢戰屢敗嘅老將，分別係計劃重奪柴灣樂康選區嘅「阿牛」曾健成、再戰灣仔樂活選區嘅前立法會衞生服務界議員麥國風，而再戰沙田瀝源選區嘅社記副主席黃浩銘算係較為年輕嘅一個。至於唯一一位新人，就可能被派往九龍西選區參選。社記曾經喺一一年區議會選舉中一鋪清袋，輸光所有議席，今次四人勝算有幾高真係未知之數。
唔單止咁，社記將會喺明年初換屆，聽聞黨內冇乜人想競逐主席一職，換句話講，即係明年就六十歲嘅長毛可能要焗住連任多兩年主席。長毛一向唔多理黨務，要佢分心照顧黨務，工作自然增加，對於年紀漸大嘅佢亦可能有啲吃力。不過，以長毛嘅知名度同號召力，接任主席相信仲可以幫社記頂落去。
唔願抬轎助新丁
即使長毛肯捱義氣繼續做主席，亦要面對明年立法會選舉。有傳長毛打算讓位畀黃浩銘，有人就勸長毛排名單第二位「抬轎」，否則以黃浩銘嘅個人實力好難跑出，但長毛對此有保留，因為佢經常批評泛民用抬轎呢招呃選民。照咁睇，社記真係前路茫茫，一係長毛退休，社記隨之玩完；一係長毛六十歲再次披甲上陣，但面對黨內青黃不接，社記隨時步民協、街工後塵，長期淪為議會內嘅一人黨。