中環出更：「貨櫃議員」不務政業抗踩場
主打基層勞工議題嘅工聯會一一年區議會選舉派出當時只喺得二十六歲嘅何毅淦（Stanley）直搗杏花邨中產區，擊敗爭取第五度連任嘅泛民主派老將陳添勝。不過，Stanley最為人熟悉嘅唔係成功擊敗泛民老將，而係開設全港首個貨櫃議員辦事處。面對激進泛民計劃喺年底區議會選舉空降挑戰，Stanley決定打造「政治素人」形象，盡量少沾手政治議題。
貨櫃又熱又嘈
Stanley一二年因為區內冇位開舖，被迫喺行人路開設一百五十呎都冇嘅標準貨櫃議辦，月租五千元，租金喺中產區算係抵到爛。不過，Stanley苦笑稱有苦自己知，鐵造貨櫃不但吸熱快、散熱快，落雨時雨水打落櫃頂仲零舍「應聲」，室內嘈過室外。忍無可忍下，加上為免當上無良僱主「虐待」助理，去年就向政府申請加建上蓋，希望可以散熱同隔走雨水聲。
佔領行動過後，激進泛民有意派人重奪杏花邨嘅根據地，背負建制背景嘅Stanley坦言，生存之道就係打造「政治素人」形象，盡量少沾手政治議題，避開反佔中議題，希望溝淡其建制色彩，令選區和諧啲。如果Stanley連任失敗，當年一手一腳砌成嘅「貨櫃議辦」就要換主人喇！
卓妮