中環出更：名人談股經：審慎有錢剩
港股短短三日爆升近兩千點，股民心情興奮，無論大戶定散戶都賺大錢，但有政商界名人就偏向審慎投資。廣東社團總會榮譽主席王國強（KK）自嘲輸唔起，直言無膽高追：「保本最緊要，我怕貪字得個貧嘛！」佢話怕高追輸掉老本，臨老要拎綜援，認真識講笑。KK又好心提醒散戶見好就收，但內心嗰句，當然希望港股繼續升啦！
熱愛論政、寫書嘅前港區人大代表吳康民，日前為新作《夜闌枕畔書縱橫》舉行新書發布及簽名會，康民叔叫齊班老友出席開心吓，除KK捧場之外，恒隆地產董事總經理陳南祿、潮屬社團總會主席陳幼南、潮州商會會長張成雄及福建社團聯會榮譽主席林樹哲都賞面到賀。
牛氣沖天 陳幼南驚訝
港股連升多日，陳幼南話至今仍難以置信：「如果上星期有人同你講，話港股嚟緊會升二千幾點，你一定以為佢黐線，但事實真係升咗好多。」話雖如此，佢唔敢追貨，投資前會訂好目標，達標就沽貨，再升都唔會貪。選擇唔追貨嘅仲有林樹哲，因為佢自爆大部分錢投資喺「磚頭」上，手上一股股票都無。陳南祿就謙稱唔識睇市，即使貴為馬會大董，亦唔敢亂貼馬匹喎。
當日中午卓妮又喺香港會所外遇到行政會議成員李國章，佢睇好港股後市，預測年底可創新高。不過，佢提醒小股民入市前做足功課：「世界各地嘅財金官員講嘢，都無話一定準，入市前要睇清睇楚，千祈咪買大開細，買細開大。」
卓妮