離島遊逼過旺角 捉到鹿唔識脫角

嗱，好似長洲咁，淨係前日就迎來三萬名旅客，中環渡輪碼頭一早就出現過千人嘅蛇餅，島上無論係市中心抑或食肆都人滿為患，墟冚程度拍得住太平清醮。有市民回程時排咗成粒鐘都未落到船，話早知咁多人就唔嚟喎。旅客固然掃興，長洲居民亦係怨聲載道。有人呻遊客逼爆唔敢出街；有人抱怨搭船出市區極之不便，好難預時間返工喎。

本來呢，五日連續假難得悠閒，呼朋喚友入離島兜番轉好正路，家陣嘅問題係，全港離島超過二百個，點解嚟嚟去去唔係長洲就係南丫島，唔係南丫島就係大嶼山？全世界一窩蜂湧晒去，有乜法子唔逼爆吖！

講到呢度，功夫茶冇辦法唔翻特衰政府嘅舊帳。係人都知，香港四面環海，唔少離島景致獨特，本身就係豐富嘅旅遊資源，弊在港府有眼無珠，就算捉到鹿都唔識脫角。當年沙士過後，經濟蕭條，港府話會協助本地旅遊業界開辦離島一日遊，初頭反應不俗o架，但好快就冇晒聲氣。鬼咩，島上咩配套設施都冇，尤其係交通極之唔方便，想唔摺埋都唔得喇。

所以話，港產官僚食嘢唔做嘢，做嘢打爛嘢，唔破壞旅遊資源已經偷笑，旨意佢哋開發，同緣木求魚冇乜分別。再以蒲台島為例，以奇岩怪石著稱，有「香港南極」嘅美譽，發展生態旅遊潛力無窮，點知年前本報踢爆有人懷疑喺島上私建骨灰龕位，大興土木，搞到烏煙瘴氣，旅客望而卻步，當局居然闊佬懶理，關人個關，問題至今仲未解決，你話係咪離譜吖。

冇計喇，港產官僚冇嘢叻，最叻係吹水。離島遊固然係齋噏，發展大嶼山講咗十幾年，一時又話打造商業購物城，一時話發展水療度假村，到依家仲係紙上談兵。打造維港成為世界級海濱，亦係雷大雨小，至今只有十分之一海岸線有海濱長廊，唔少仲係求求其其，毫無特色嗰隻。最好笑嘅係，港府最近又有新搞作，聲稱要效法新加坡，喺香港發展河道公園喎，照港府嘅往績嚟睇，睇怕都係煲冇米粥居多咯。

一句講晒，香港唔係冇景點，更加唔係冇旅遊資源，而係官僚有眼無珠唔識寶，結果搞到景點十年如一日，市區逼爆，盞衍生中港矛盾嘅咋。家陣旅客棄港而去，驅蝗、拖篋客通通收得工，市民終於可以耳根清淨，旅遊之都玩完嘞。