政情：今日你上鏡：葉劉「泰」火辣 熱褲晒長腿

政改方案及第二階段諮詢報告預計復活節假期後公布，唔少立法會議員都趁空檔離港度假充電，其中葉劉淑儀似乎對熱辣辣嘅泰國情有獨鍾，繼去年聖誕節到當地露臂上陣學煮冬蔭功後，葉劉前日再喺社交網站上載西裝外套配熱褲，展露白滑長腿歎英式high tea（下午茶）嘅照片，相當吸睛。但葉劉high tea又豈止為咗晒長腿？佢話今次專誠到曼谷文華東方酒店舊翼high tea，係因為現址曾係唔少歐洲大文豪喺泰國嘅聚腳點，《動物農莊》作者George Orwell亦係住客之一。葉劉建議大家去泰國可到此一遊，感受多位大文豪文學創作之路。