梁美芬○七年當選九龍城黃埔東區議員，翌年一併當選立法會議員至今，所以黃埔都算係佢成名之地。有佔領行動團體「青年新政」將派出ＯＬ美女游蕙禎化身社區主任挑戰美芬。游蕙禎當日就話，當區居民好難約到梁美芬，但美芬尋日就反駁話：「街坊需要我嗰時就會見到我」，又批評對方「憑空講」好容易。
游蕙禎趁復活節頻頻落區，近日都有上載相片到社交網站，話自己喺黃埔花園對開街站，似乎來勢洶洶。美芬尋日回應話，歡迎任何人落區，但話鋒一轉，就講明希望年輕人做實事，唔好做「討厭嘢」。對於被游蕙禎暗批少落區，美芬就教游蕙禎，要學習服務地區就唔好自以為是，「憑空講」佢少落區好容易，舉例自己跟進港鐵延線，搞好多活動，「街坊需要我嗰時就會見到我」，所以話佢少落區係假象，相反游蕙禎係喺「空中樓閣」，亦毋須要與對方會面做騷，仲叫游蕙禎唔好騷擾街坊。
即係話游蕙禎曾騷擾街坊？美芬話有人反映喎。睇嚟兩女未「交鋒」，隔空罵戰已一觸即發！