政情：怕死袋巾 唔肯袋住先

黃成智稱已收黨「通知」

袋巾傑話，睇唔到點樣喺「袋住先」嘅情況下，可以有更好條件爭取民主，因為袋住先會「死得慘啲」，更加無尊嚴。佢認為中央到時會覺得交咗功課，唔需要再設計一個符合《基本法》四十五條、同時無不合理限制嘅選舉制度，到時再爭取都係徒勞，亦好難再動員民眾爭取，所以重申泛民唔會接受人大「八三一」框架下嘅政改方案。

出席同一節目嘅民主黨（白鴿黨）中委黃成智就唔係咁睇，佢話聯署只係近日兩至三人「茶餘飯後」討論話題，至今並未成事，但認為只有通過政改方案，選民先有運用選票嘅政治力量，又勸泛民要令民主走前一步，就要放下個人榮辱。佢強調有呢個諗法並非收咗共產黨錢或獲委任為房委會成員。

黃成智透露，已收到黨通知會就聯署一事同佢會面，咁係咪代表違反黨紀？佢認為否決政改方案同按照依家諗法通過方案，原則同爭取普選立場冇分別，但如果黨認為佢有違規，佢都願意接受處分喎。咁又奇嘞，點解佢要為一個「茶餘飯後」嘅話題，而要涉違反黨規兼甘願接受處分呢？

狄志遠批激進泛民打壓

另一溫和派黨友狄志遠接受查詢時都話，泛民溫和立場人數唔少，好多都希望政制向前行一步，但激進泛民就將呢啲聲音打壓，只識得批評佢哋「投共」，唔同立場就係壞人，「指罵係有不軌企圖」，搞到溫和聲音變得沉默，所以如果有人搵佢參與聯署都會支持，畀一個平台反映溫和聲音。如果溫和嘅聲音可以令泛民死硬派回心轉意，就唔會搞到呢個無彎轉嘅地步啦！