中環出更：小花變「阿珠媽」 阿容靠B箍票
元朗區議員劉桂容（阿容）於一一年區議會選舉挾「工聯小花」之名，險勝空降元朗富恩選區嘅立法會議員李卓人，令唔少泛民主派支持者跌到一地眼鏡碎，阿容亦於選舉翌年下嫁黨友、荃灣區議員葛兆源後趕緊生Ｂ。四年過去，阿容已由昔日小花升呢成為「阿珠媽」（師奶），佢笑言經常帶埋阿仔同區內師奶街坊見面，相信都箍到唔少選票喎。
阿容笑言年紀都唔細，寧願街坊記得佢叫阿容，都好過叫佢「小花」，而佢結婚生Ｂ後，同區內嘅媽媽反而熟落咗。加上天水圍唔少街坊都係新來港人士，「老夫少妻」情況亦多，阿容可以當年新移民嘅經驗開解街坊嘅心事。唔少媽媽生Ｂ後都湊仔大過天，阿容索性帶埋阿Ｂ參加工會有份舉辦嘅playgroup（遊戲小組），出動「ＢＢ外交」搶票。
連任遇挑戰 「追女」受影響
據聞李卓人無意捲土重來參選，但上屆拍住佢參選嘅工黨社區幹事強國偉仍然密密落區；另有泛民陣營嘅年輕人成立「天水圍民生關注平台」，擺明衝着阿容而來，唔會畀阿容自動當選咁着數。有對手挑戰連任，阿容話除咗要更加勤力落區，連「追女」計劃都受影響，一切都要等到年底區選後先再「復工」生Ｂ女喇。估唔到區選都會影響人口增長進度喎！
卓妮