有慈雲山慈樂邨街坊向本報投訴，指入夜後邨內垃圾站有大量老鼠出沒；記者又現場睇過，發現十幾隻老鼠聯群結隊搵食，睇見都惡心兼起晒雞皮疙瘩。
其實，香港鼠患已不是新聞，早前旺角有老鼠出現在壽司店、大搖大擺過馬路，而日前青衣城有老鼠大鬧食肆亦嚇到啲食客尖聲怪叫，走夾唔抖……
誠如功夫茶話齋，成個香港早就淪為老鼠樂園，又點止慈樂邨被老鼠攻陷吖。
講真，凡食肆林立，橫街窄巷，必有碩鼠出沒，而有關部門如房署、食環署都會話已展開滅鼠同防鼠行動，之不過，滅到今時今日，防到驚蟄春回大地，鼠患依然，而蚊患、蝨患、蟻患樣樣齊！
咁嘅官僚體系，一味吹得而無實效，抵畀功夫茶恥笑：自己唔識滅鼠都算嘞，早前食環署居然禁止九龍城街市商戶養貓，搞到該區鼠患指數飆升，榮登十九區之首，真係打針都冇咁快見效，唔怪得有人將食環署改名為「護鼠署」喇。
老朽不禁想起一個借鼠諷人嘅老笑話。話說老和尚接待客人，貓蹲在一旁。和尚對客人說：「人言雞有五德，此貓亦有之：見鼠不捕，仁也；鼠奪其食也而讓之，義也；客至設饌則出，禮也；藏物甚密而能竊食，智也；每冬月輒入灶，信也。」
今食環署官僚，睇怕亦有護貓愛鼠之情，知貓亦有「五德」，索性禁止九龍城街市商戶養貓，讓老鼠逍遙遊，如此慈悲為懷，鼠若有知，偷來的糧食，怕要分一些給食環署一眾官僚，感念其好生之德也！
香港呢個躁動社會愈來愈反智，明明係暴力反水客，竟有不知所謂嘅大學導師反稱示威者是「弱者」，這與老和尚指不捉老鼠的貓有「五德」同出一轍。