政情：有相為證：民記呼籲「責民公盡任」
「責民公盡任」？假如市民喺街上睇到有橫額寫上呢五個大字，肯定一頭霧水，隨時誤以為係古文。
呢五個字原來是民建聯（民記）大埔社區主任梅少峰嘅宣傳易拉架標語，呼籲大家登記做選民，但標語次序調亂，本應係「盡公民責任」，五個字只得一個「任」字嘅位置正確，惹來網民熱話，冷嘲熱諷。
梅少峰：已即時更正
梅少峰解釋話，標語由團隊製作，擺放街站時已有街坊提出指正，未料網民迅速「cap圖」，又話得悉錯誤後已即時更正，希望各街坊以後繼續提點佢喎。不過，我哋發現梅少峰並非首次寫錯字，兩日前佢喺社交網站已將「乘客」二字錯寫成「乖客」。至於民記出錯橫額亦早有前科，曾把立法會議員陳克勤的名字寫錯做「陳克群」，究竟該黨大埔支部團隊出咗咩問題呢？