財政司司長曾俊華（鬍鬚曾）一向鍾意透過網誌推銷政策及個人理念，尋日佢又借網誌講到美國前聯儲局主席伯南克上星期分別係Brookings Institution嘅網頁同Twitter開咗帳戶，話伯南克同佢一樣都變成「鍵盤戰士」。鬍鬚曾竟然諗到用依個方法同伯南克拉關係，認真厲害。
不過，伯南克之前掌管嘅聯儲局影響全球經濟變化，而鬍鬚曾只係香港嘅財政司司長，咁比較唔知算唔算係「蚊脾同牛脾」呢？況且伯南克都係辭任聯儲局先加入網絡世界做「鍵盤戰士」，但鬍鬚曾自從有咗facebook（fb）帳戶，就經常更新狀態，又會上載相片同影片，用咁多時間經營fb，唔怕疏於正事？
鬍鬚曾喺網誌又講到，喺座談會上兩次見到一個好支持把握「一帶一路」發展機遇嘅港大女同學Mathilda，仲話Mathilda呢個名算冷門，唔知靈感係唔係來自《這個殺手不太冷》（Leon）裏面Natalie Portman嘅角色，叫人地喺fb同佢講喎。鬍鬚曾又話，「心中富有」唔等於忽視經濟發展，兩者之間其實有好大嘅兼容空間。