中環出更：世界真細小 樹根遊日巧逢「蘭卿」

好多港人都趁復活節出外旅遊，唔少立法會議員都係呢個原因而飛走。不過，世界真細小，議員劉慧卿（卿姐）同何秀蘭（Cyd）結伴遊日本京都，估唔到喺當地同鍾樹根狹路相逢，唔知佢哋有無約埋喺櫻花樹下辯論政改呢？卓妮尋日打畀仍然身在京都嘅樹根，佢話的確係撞到卿姐同阿Cyd。難得唔同黨派聚首一堂，本來係大好機會喺櫻花下風花雪月一番，但樹根話三人只係打個招呼就要講拜拜，想講多幾句都唔得。唔通佢哋平時政見不同，出到外地都面左左？樹根話當然唔係啦，因為大家都趕時間搭火車去嵐山賞櫻，所以講咗幾句就算。