中環出更：潘宗光：慾火街頭失敬失禮
早前一對內地來港讀大學嘅情侶喺香港理工大學佛光街宿舍外「打得火熱」，於馬路旁邊席地上演「活春宮」，令人嘩然，男方最終被警方拘捕。尋日清明節，卓妮喺聖賢教育學會舉行嘅清明祭祖大典上見到篤信佛學嘅理大前校長潘宗光，佢坦言對事件感到非常痛心，希望教育可將香港帶回正軌。
潘宗光指「孝是中國文化之根，敬是中國文化之本」，作為大學生應懂知書識禮，尊重自己及別人，批評涉事學生做不到當中的「敬」和「識禮」，懶理途人目光慾火街頭實在令人感慨。
湯恩佳籲以中國人為榮
孔教學院院長湯恩佳則發現，原來近日喺英國也有同類事件發生，反映事件在全球每個國家都有可能發生。佢話，唔同地方有唔同嘅文化及觀念，如果將其他價值當成自身的價值，好容易導致道德淪亡。佢又指現時香港人出現好大問題，部分人唔願意承認自己係中國人，但其實港人應該多了解及認識孔子文化嘅價值觀，以自己係中國人為榮。
至於身為基督徒嘅立法會議員葉劉淑儀，繼農曆新年出席車公廟活動被舞麒麟撞飛後，尋日再次擔任主祭角色，仲着埋特定服飾主持活動，唔知同佢本身宗教有冇衝突呢？葉劉提到日前兩位大學生席地上演「活春宮」事件時，佢就覺得好惡心、失禮晒！
葉劉仲拋書包引用《論語》中的「克己復禮為仁」，意指大家應克制自己私欲，令個人言行舉止合乎禮節，雖然繁殖後代好重要，但都要守禮法，否則同禽獸無分別喎。同場的民政事務局副局長許曉暉亦表示，「人必自重而後人重之」，籲學生避免做出輕慢行為。
卓妮