唔少智能手機用戶都會安裝手機即時通訊程式WhatsApp，貪佢方便好用，但係隨之而來就係受到廣告滋擾。最常見嘅例子就係補習導師中介公司，亂咁將只差一、兩個數字嘅電話號碼加入群組，以便發送廣告訊息，令人不勝其煩。最近有人倣效設立「我要真普選」群組，但係隨即被加入群組嘅人夾雜粗口大鬧，話群組管理員侵犯私隱，仲話唔排除採取法律行動，呢個乞人憎嘅硬銷手法，分分鐘適得其反。
