政情：通識試冇考政治 「仲」有解釋
中學文憑試通識科一直被批評偏重政治題，但日前開考就爆冷未有與政治有關嘅試題，引起外界質疑係咪受到政治壓力。考評局主席陳仲尼（Rock）尋日出席活動時解釋，政治題目其實「可考可唔考」，如果年年都考政治，學生容乜易貼中題目喎！
阿Rock強調，考評局每年都邀請大學教授、中學校長同資深通識科教師出任審題委員，依足機制出題。咁佢有冇信心喺通識科取得5**佳績？
阿Rock笑言，若果打「天才波」要攞5**有難度，但就認為以其人生閱歷攞個四、五級都有機會嘅。
學《基本法》各師各法
清華大學法學院長王振民早前提出，應該推廣「人手一冊」隨身攜帶《基本法》，作為特區同港人嘅行為指南，身兼基本法推廣督導委員會成員嘅阿Rock苦笑話，佢都冇隨身攜帶《基本法》，建議市民可「各師各法」，了解《基本法》內容。