早前新界各區接連發生反水貨客示威，激進示威者備受指摘。有份參與反水貨客示威嘅理大導師兼熱血公民成員鄭松泰，尋日喺電台節目中承認示威冇實際成果，但就死撐有效果，事關若冇呢啲示威，水貨問題就唔會喺上月北京「兩會」期間被討論喎！
講到早前示威者喺屯門推跌一名老伯，被指以暴力手段表達訴求。鄭松泰卸膊話，係傳媒混淆咗激進同暴力，同埋係老伯用支棍襲擊示威者先，仲話示威者冇公權係弱者，亦係一簽多行政策下嘅受害者，示威難免會有小瑕疵，唔應該無限放大。佢仲搬埋秦末嘅陳勝、吳廣起義出嚟講，反問係咪應該由示威者向政權道歉喎！
歪理連篇後，鄭松泰承認示威會令遊客有唔好印象，就係香港人鍾意周街搞人。至於熱血公民嘅底線，鄭松泰強調唔主動襲擊他人，但如果被打就會自衞，否則就違反常理咁話。