政情：乒乓內交 中港雙贏
基本法推廣督導委員會尋日舉辦「《基本法》頒布二十五周年研討會」，有「乒乓孖寶」之稱嘅前香港奧運代表李靜及高禮澤，現身同大學生分享《基本法》同「一國兩制」嘅體會。李靜爆料話，喺《基本法》之下香港社會繁榮穩定，內地選手都想嚟香港「血拼」購物，佢有買嘢經驗，而內地選手就喺打波上有優勢，大家互相交流就可以達致雙贏喎。咦？用「血拼經」換「波經」，究竟邊個着數啲？
研討會上有人問「乒乓孖寶」，比賽時與中國隊選手交手，有冇自己人打自己人嘅感覺？高禮澤就話，其實大家上場都係全力以赴，不過落場後都有交流，佢哋會向中國選手請教先進技巧，呢啲都係自己人嘅好處喎！
李靜就突然爆料話，喺《基本法》之下，香港係穩定繁榮嘅社會，內地選手都會想嚟香港購物，「我哋有呢方面嘅經驗，而打波佢哋有優勢」，大家互相交流就可以達致雙贏喇！李靜咁都扯到落《基本法》，睇嚟佢唔止打波同買嘢好叻，吹水都有番咁上下功力。
肥亨籲青年拓國際視野
除咗「乒乓孖寶」之外，商務及經濟發展局前局長馬時亨（肥亨）及前特首辦主任、港大醫學院院長梁卓偉都參與對談。肥亨被問到喺香港從事金融業嘅前景時，話香港做金融業仍係前途無可限量，不過佢就告誡年輕人，唔好以為住喺香港好威，其實內地學生同「海歸派」中英文都好好，香港年輕人一定要喺語文能力加把勁，同埋要有國際視野至得。
梁卓偉醫療吹到創科局
梁卓偉就話，喺「一國兩制」下，香港作為開放型社會，對全球醫療科技及資訊接收得好快，除咗可以造福病人，亦可以帶動創新科技新經濟體，講講吓，仲話希望創新及科技局成立後，可以令生化醫學發展更旺盛。咁都畀佢兜到個圈硬銷創科局，睇嚟商經局局長蘇錦樑都要跟佢學吓嘢先得喇！