中環出更：「戴錯帽」女警司調任許Sir下屬

即場拆彈 高層賞識

曾戴錯皇冠警徽帽嘅靚女高級警司關翠貞亦因禍得福，聽聞因為佢當日識「執生」，即刻換番洋紫荊警徽帽，輕易化解危機，因而獲警隊高層賞識，今個月二十號就會過檔P記任高級警司，做許Sir嘅得力助手。

關翠貞當日被傳媒發現戴錯帽後，即刻換帽重返現場，首先大讚傳媒好眼力，又認係佢個人疏忽，再加上一個甜美笑容，輕易將危機化解。佢對答大方得體深得高層賞識，認為係公關之材，可以幫手拆彈，所以調派佢到P記。唔講唔知，許Sir及關翠貞仲係中學師兄妹添！

關翠貞係警隊公認嘅警花，睇番佢年輕時嘅相片，確有姿色。佢與同任職警界嘅丈夫育有兩子一女，先後駐守多個部門，包括沙田分區、鐵路警區及人事科。至於現任P記高級警司江敏強，將調任商業罪案調查科。

卓妮