從前有人生咗個毒瘡，初時覺得無乜所謂，闊佬懶理，點知毒瘡愈嚟愈大，變成絕症，想醫治已經為時已晚，呢個就係成語養癰遺患嘅典故。
點解功夫茶咁有閒情講成語故事？咪因為港府養緊個毒瘡囉。酷刑聲請制度千瘡百孔，等於大開中門，來港搵食嘅假難民愈嚟愈多，搞到香港烏煙瘴氣，後患無窮，再唔開刀做手術，遲早爆大鑊嘅咋！
東方報業集團日前獨家報道十三名印度籍男子乘搭航機抵港後即「舉手」提出酷刑聲請免遣返，事件唔止引起社會廣泛關注，多名立法會議員更加質疑制度存在漏洞，要求港府解畫。點知唔問猶自可，一問把幾火，根據入境處資料，去年接獲嘅聲請個案多達三千四百宗，較前年激增六成三，而新財政年度嘅人道援助及法援等開支，更加預料高達六億四千萬元添，擺明就係畀人予取予求搵着數喇。
面對連串質疑，當局承認現行機制被濫用，包括有申請人未抵港已經有律師代表提出聲請，以及部分申請人對聲請一知半解，明顯有蠱惑。不過當局話喎，基於高度公平原則，不能因為有人濫用而忽略真正有需要幫助嘅人喎，仲重申會加強打擊黑工咁話。
簡直九唔搭八！既然知道有人濫用機制，居然繼續中門大開，來者不拒，咁咪即係鼓勵更多假難民湧港？咁搞法，點樣打擊黑工都冇用喇。港產官僚效婦人之仁，養癰遺患，簡直就係慷納稅人之慨。
即係咁，幫人唔係唔啱，不過都要睇幫乜嘢人至得o架。現時以酷刑聲請留港嘅所謂政治難民，實際上百分之九十九同酷刑冇關，而係來港食大茶飯嘅「經濟難民」，港府保護佢哋，邊個保護市民？係人都知，愈嚟愈多難民滯留香港，唔止浪費公帑，而且帶來嚴重社會及治安問題。以難民聚居嘅重慶大廈為例吖，黃賭毒黑樣樣齊，唯一冇嘅就係良好嘅治安同名聲。有「人間妖域」之稱嘅蘭桂坊更加淪為非裔同南亞裔假難民嘅犯罪樂園。呢，日前之嘛，又有一個假難民疑因販毒被捕，身上搜出一批毒品，懷疑係區內拆家。
講起真係無奈，香港本來已經烏煙瘴氣，仲要攬多一個難民炸彈上身，唔通真係嫌未夠亂咩？有辦大家睇，內地當局縱容幾十萬非裔人士聚居廣州，年前爆出數萬名非洲人騷亂事件，唔通咁都未足以敲醒港產官僚嘅麻木神經？
前車可鑑，港府如果唔想香港變成難民港，必須盡快堵塞漏洞，將假難民毒瘡切除，嚴打有組織人蛇活動，如果唔係，搞到尾大不掉，民怨爆發，你哋就唔慌唔變政治難民嘞！