泛民主派玩「拉布」、又搞不合作運動，拖垮立法會運作，引起市民不滿亦在所難免。泛民立法會議員單仲偕（騸雞）嚟緊喺復活節假期同太太去旅行，但佢話作為議員跟旅行團實會被團友認得，如果有團友鬧佢兼叫佢唔好「拉布」，都咪話唔尷尬，所以佢就決定同太太潛水，享受寧靜嘅海底世界。
騸雞兩公婆今個星期將會去菲律賓Puerto Galera（PG島）潛水，佢話如果跟普通旅行團去旅行，萬一團友係咁鬧佢同泛民「拉布」，真係咩心情都冇晒啦。而今次佢係參加潛水團，只包一餐早餐同「一日兩潛」，其他時間都係自由活動，斷估冇人會喺潛水時鬧佢啩？不過，如果騸雞真係咁驚畀人鬧，就唔好參與「拉布」啦！
講開又講，騸雞去年復活節都去過馬爾代夫潛水，佢話一日使費已經等於今次菲律賓五日團嘅費用喇。雖然去菲律賓係划算啲，但佢就話去呢啲地方要小心飲食，食炸魚薯條應該最安全喎。