年薪高達三百四十二萬元嘅教育局局長吳克儉（吳得掂），過去合共外訪二十四次，離港日子達八十七日，共花近一百八十萬元公帑。立法會財務委員會特別會議尋日討論教育局開支預算時，議員就諷刺吳得掂「八十七日環遊世界」、「搵份工周遊列國」，但吳得掂就話外訪行程經過細心策劃，有實際需要及目的喎。吳得掂大多數外訪行程都係入住五星級酒店，搭飛機仲要坐商務客位添，真係使公帑歎世界唔使本，難怪佢話外訪行程經過細心策劃嘞！
