政情：又有高官跳船！
政府呢個「熱廚房」已經靜咗一排冇人請辭，但近日又有位高官「跳船」，佢就係運輸署助理署長蘇祐安。原來佢過檔去慈善機構東華三院做執行總監，接替喺東華做咗四十五年嘅老臣子、現任執行總監吳志榮（Stephen），掌管該機構行政運作及機構事務等工作，即係等同大內總管。
今年四十九歲嘅蘇祐安，加入政府多年，曾多次在大塞車及車禍事件中擔任解畫工作，去年亦有就佔領行動導致封路等問題出來交代最新交通情況，處理及臨時應變表現不錯，仕途尚算平穩。不過，數數手指計吓條數，佢退休前最多只係可以升到副署長級別，而且工作壓力大，相比東華三院執行總監工作，應該比較「他條」，至於薪酬及福利就唔知喇。
東華就職禮 蘇祐安冇影
依家各行各業都話請人艱難，就連慈善機構都一樣，據聞東華三院為呢個執行總監職位尋覓合適人選已有一段日子。執行總監Stephen喺一九六九年畢業後就加入東華大家庭，一做就做到依家，認真長情。話說早幾年Stephen已經有意退休，但東華一直都未搵到合適接班人，早幾年仲試過搵到合適人選後先至臨門一腳「撻Ｑ」，令Stephen繼續做到依家。
如今Stephen真係可以功成身退，享受退休生活，而蘇祐安亦將於本月八日正式就任新執行總監嘞。根據院方透露，聘請執行總監一職就好似大學選校長一樣，都有個遴選委員會負責，而且並唔係一擊即中，佢哋曾喺商界等唔同公司及機構物色過唔少心水人選，前前後後花咗超過一年時間先至成事。
不過，東華三院董事局尋日舉行就職禮及晚宴，但就唔見候任執行總監蘇祐安嘅蹤影，莫非佢要等到下周三正式就任先至見大家？