中環出更：創科諮委會 莫乃光無份
政府力推嘅創新及科技局二月中宣布「胎死腹中」，由財政司司長曾俊華出任主席嘅「創新及科技督導委員會」都要暫時「降呢」為「諮詢委員會」。創新及科技諮詢委員會成員名單尋日揭盅，除咗意料之內由理工大學前副校長楊偉雄出任主席外，另一亮點成員係現為科技公司老闆嘅「星之子」陳易希。不過，成份名單就搵唔到立法會資訊科技界議員莫乃光（Charles），認真失威。
陳繁昌陳易希拍住上
政府表示，委員會成員主要來自學術界、業界及與創新及科技相關嘅團體，四月中舉行第一次會議。Charles無緣入閘，原來係由建制陣營嘅立法會議員葛珮帆頂上。Charles酸溜溜話，係咪加入委員會唔係最重要，但認為委員會成員偏重學術界同工業界，加上部分人原本已經好多公職在身，覺得委員會政治傾向比較強喎。
除出身科技大學嘅陳易希外，科大校長陳繁昌亦係成員之一，一中一青拍住上；其他新成員仲包括航拍機市場龍頭公司老闆汪滔、鳳溪公立學校行政總裁馬紹良及多間大學代表等。
卓妮