中環出更：「忠」告學生：改變社會 宜從政
香港台灣同鄉會（同鄉會）早前舉行新春晚會，旅港台灣幫濟濟一堂，同為台灣人嘅珠海學院校長張忠柟都有出席。佔領行動後，香港青年愈來愈激進，唔知張忠柟點樣教育學生呢？佢話當年喺美國讀書時亦參加過反戰示威，但結果美國依然故我，而政治利益就歸於政客。所以佢勸解學生若想改變現實不如從政，不過係做議員唔係做官喎！
「做官冇用 要入議會」
張忠柟話，當年佢讀研究所時曾參加反戰，依家諗番轉頭，覺得當時年輕人嘅熱誠被政治人物綁架，根本改變唔到政府繼續主導幾場戰爭嘅事實。所以佢話畀學生知，如果有熱誠改變社會就要從政，但做官冇用，要走入議會殿堂至得。
當晚到場嘅仲有台北經濟文化辦事處處長嚴重光、同鄉會前會長林添茂、林耀明、賴李承美及現任會長邱文潛等人，氣氛熱鬧。嚴重光話，近年香港學生到台灣升讀大學人數屢創新高，兩年前佢哋開始舉行招聘會為學成回港嘅年輕人搵工，甚受包括台資銀行在內嘅台資企業歡迎。由於成效唔錯，所以今年將擴大招聘會規模。
香港台灣婦女協會會長林華琴（Judy）都有到場，佢話六月將到台灣羅東送暖，將早前籌到嘅善款捐畀聖母醫院，事關醫院容許貧苦病人寫借條睇病，若三年未能還款，院方會銷毁借條。Judy深受此善舉感動，決定跨海相助。
卓妮