政情：公文袋退黨也拉布？
政黨政團於選舉前後嘅離離合合，於政圈稱得上係司空見慣，之不過最近有「八十後」嘅政界新鮮人何啟明身處夾縫有苦自己知。事關佢依家同時有公民黨（公文袋）同民協雙重成員身份，聲稱自從決定為民協効力後，一早提出有意退出公文袋，之不過之後不了了之。有政界中人更疑為何抱打不平，形容退出公文袋仲難過「上樓」，質疑有人拖延何嘅退黨申請。莫非身為公文袋黨魁梁家傑（袋巾傑）拉布夾硬留人，唔畀人轉會跟民協馮檢基？
為民協工作 欲釐清身份
今次捲入雙重黨籍風波係「八十後」何啟明，佢喺中學時代加入公文袋，一直係公文袋嘅普通黨員，不過佢自稱畢業後冇幫公文袋做嘢，反而走咗去民協打工。何啟明形容於民協做咗幾年工作，發覺公文袋嘅風格唔多適合自己，有意為民協効力，甚至表明有意參加年底區議會選舉。
據聞民協於舊年三、四月決定派何啟明落區做前期準備，當時何先醒起自己仲係公文袋黨員，於是想盡快搞清楚黨籍問題，曾於去年暑假同公文袋港島區支部主席梁兆新提出退黨要求，據知梁兆新當時知道何喺民協做緊地區工作，亦有問佢係咪想參加區選，反提出公文袋可以安排落戶荃灣區，換取佢繼續留喺公文袋。
公文袋：未收書面申請
不過，何啟明思前想後決定退出公文袋，又透過電郵向該黨黨務部索取退黨申請表，但黨務部一直冇作出回應，而何啟明對於退黨一事亦冇再跟進。何啟明承認喺事件上處理得唔係咁好，但盼望公文袋盡快處理佢嘅申請，費事畀人借雙重黨籍問題借題發揮。
公文袋總策劃幹事歐陽志飛隔空回應話，公文袋至今未收到何啟明嘅書面退黨申請，知悉事件後已即時打咗畀何啟明，又話如果對方真係想退黨，最好盡快搵佢哋搞埋啲手續，因公文袋亦唔接受黨員有雙重黨籍。究竟今次雙重黨籍風波會否升溫，觸發公文袋同民協嘅政黨政團層面互指不是，就睇吓涉事各方能否盡快「拆彈」平息事件。