中環出更：向卿姐「撬票」袁國強食檸檬

民主黨（白鴿黨）等泛民多個政黨表明會否決人大常委會「八三一」決定框架下嘅政改方案。政改三人組成員之一、律政司司長袁國強尋日再度接受民主黨主席劉慧卿（卿姐）嘅網台節目訪問，疑再度向白鴿黨「撬票」，呼籲卿姐唔好爭拗普選「真假」之別，仲叫佢「高抬貴手」，但最終都係食檸檬收場。

袁指政改部分爭拗係「公說公有理、婆說婆有理」，由於時間無多，不如討論如何增加入閘階段嘅透明度，舉例指期間可進行全港性辯論，另外提委會都要經選舉產生，一樣面對民意壓力等。

不過，卿姐反駁話，「真普選」係好重要，又提到立法會主席曾鈺成都公開叫中央回應「袋住先」係咪等同「袋一世」，但佢同時指出，最重要係解決特首普選是否符合國際標準。

對於外界要求承諾一七年特首普選非終極方案，袁國強隔空回應話，如果要政府作出修改承諾，或者涉及法律問題，好似應該搵邊個作承諾等。佢又話，如果由中央或者特區官員作官方表述令港人放心，就可以睇吓做唔做到。

卓妮