中環出更：藥商憂邊境「假貨城」
早前反水貨客嘅「光復」行動接二連三發生，有聲音希望邊境購物城同前海嘅港貨中心可以盡快落成，解決水貨客對本港居民帶來困擾嘅問題。嶺南藥廠總經理呂偉強（Coty）話，業界最關注嘅始終係假貨問題，盼望有關部門嚴厲執法，確保售賣嘅係正貨，否則邊境購物城變成「假貨城」就弊喇！
香港中華製藥總商會（商會）早前舉行新一屆理監事就職典禮，城中知名老牌藥廠齊集。
講起近排熱議嘅邊境購物城，身為香港中華製藥總商會理事長嘅Coty話，香港製造嘅老牌藥品受惠於內地客，若設立專區畀內地客購買港貨，業界梗係支持，不過前提係要確保係正貨，事關消費者食咗假嘢，到時認真大件事。
反水客示威連累業界
當晚出席嘅藥界翹楚仲有身兼商會首席會長嘅李眾勝堂保濟丸藥廠掌門人李嘉倫、京都念慈菴總經理謝國昌、位元堂執行董事鄧梅芬（Karen）、百成堂主席李應生及兒子李俊文（Thomas）等人。
Karen話，反水貨客示威令公司喺屯門、上水等地嘅分店生意受挫，幸好業主肯傾減租。
雖然內地客對本港零售業好重要，但Karen話，內地客只佔集團營業額約三成，透露將會喺銅鑼灣開旗艦店，打造國際品牌形象。
對於近年百物騰貴，身為百成堂第四代後人Thomas話，原本家庭常用嘅湯料藥材價格好平穩，但前年川貝售價突然急升，去年就輪到淮山及杞子勁升三成，幸好今年尚算平穩咁話。
卓妮