單車違泊斜坡 部門懶清理
「啲單車泊到瞓低晒，仲好多都生晒銹，有啲又爛晒已經踩唔到，幾十架就咁放喺度都冇人理。呢度仲要係斜路，如果一陣啲鎖鬆咗，啲單車好似骨牌咁冧晒落嚟點算？」居於火炭的李小姐指出，火炭村近東鐵火炭站斜坡欄杆有大量單車違例停泊，部分更已損毀嚴重，不滿有關部門未有派員清理，擔心發生意外將危及途人。
民政處稱會加密次數處理
沙田民政事務處發言人表示，由多個部門組成的小組每月會定期舉行聯合清理行動，在沙田區內的單車違泊黑點處理違泊單車。發言人又稱，月前曾接獲一宗有關上址單車違泊的投訴，而針對一些緊急或嚴重的個案，工作小組會加密聯合清理次數，亦會安排於該處張貼宣傳海報，勸喻和教育市民自律守法。