太和無牌韓食 食署放生

冼小姐家住大埔，去年十月發現太和路有韓式食肆開業，裝修美輪美奐，並以即叫即煮作招徠，經常吸引大批食客在門外等候入座，早前遂決定與友人光顧。

衞生消防安全存疑

冼指甫入店內即見牆壁與收銀枱前放滿卡通動畫主角模型作裝飾，惟於一般食肆常見的「普通食肆牌照」則欠奉，懷疑食店並未領牌，更擔心對食客安全構成威脅，「裝修係靚，但冇牌始終都係差啲，都唔知啲嘢食係咪衞生？啲消防設施又係咪運作到？所以啲嘢有幾好食都始終唔放心！」

記者現場所見，場內僅設有約十張枱，可容納約三十人。了解當日正值午膳時分，店內早已座無虛設，記者環視該店，發現店內設有消防喉轆、灑水系統等消防設施，但卻未見持牌食肆牌照掛於當眼處，即使於食環署網站查證亦未見榜上有名。

食物環境衞生署發言人指出，去年十月接獲上述食肆的普通食肆牌照申請，惟申請人未履行有關發牌條件，故該署尚未簽發暫准或正式牌照。發言人指過去一年接獲三宗涉及上址懷疑無牌經營之投訴，去年十一月至今，只提四宗相關檢控，但未有接獲用餐後不適之投訴。至於食肆未能履行發牌條件的細節，發言人則拒絕回應。

店內當眼處並未見出示「普通食肆牌照」。	食肆設有消防裝備，包括消防喉轆（上圖）及灑水系統（下圖），惟成效存疑。	區議員張國慧批評食環署「只檢控，不取締」有欠阻嚇力。

區議員促嚴厲取締

發言人又稱，根據《食物業規例》，任何涉及出售膳食或非瓶裝的不含酒精飲品（涼茶除外）供食客即場進食或飲用的食物業處所，必須領有食肆牌照，否則即屬違法，最高可被罰款五萬元及監禁六個月，另加每日罰款九百元。

「間舖頭有晒消防灑水系統、裝修又靚，但一日未攞到牌都冇辦法知道佢嘅食物、消防同屋宇安全係咪符合標準，食客喺度食嘢係咪真係有保障！」大埔區議員張國慧認為，食環署早知悉有關店舖無牌經營，且開業近半年仍未取得正式食肆牌照，甚至暫准牌照亦未獲批出，卻僅作檢控了事，未有嚴厲取締，有「放生」之嫌，要求當局盡快檢討檢控程序，加強對市民的保障。

記者：黃芷君、詹海萍