教育局一直以私隱為名包庇淫師，搞到校園風化案不絕如縷，學生安全毫無保障。申訴專員公署早前介入調查，炮轟現行機制弊端多多，教育局至死死氣承諾年內就是否公開註冊教師名單展開公眾諮詢，簡直係後知後覺。「東方報業民意調查」顯示，多數受訪者批評當局罔顧公眾利益及學生安全，唔係無理由o架。
舊年二月，本報率先踢爆教育局拒絕公開教師註冊資料，剝奪學生及家長知情權。最奇怪嘅係，包括社工、醫生、護士、會計師及工程師等十五個專業界別，全部喺網上公開成員註冊資料，唯獨教育局始終唔肯公開教師註冊名單，被定罪教師有冇被「釘牌」嘅資料固然欠奉，連註冊名單同數目等一般資料都冇，你話係咪匪夷所思吖。
如果唔係太過離譜，申訴專員公署都唔會介入調查喇。正如調查報告指出，教育局一直以《私隱條例》及《教育條例》未賦權公開資料為由耍太極，堅拒公開教師註冊資料，完全不合理。其實，相關資料關乎學生切身利益及人身安全，點都重要過教師私隱喇。再講吖，其他專業界別統統披露註冊資料，點解教師可以特殊？唔通教師嘅私隱比其他人更重要？
所以話，近年校園風化案層出不窮，教育局絕對要負最大責任。到底有幾多色狼潛伏校園，家長一無所知，當局變相保護色魔，根本就係助紂為虐。嗱，聽吓民意點講吖。「東方報業民意調查」發現，四成五受訪市民批評教育局漠視家長及學生知情權和利益； 二成六認為現行把關機制存在漏洞；一成八擔心學校為保校譽隱瞞教師失德行為。
冇錯嘞，市民眼睛係雪亮嘅。好多國家同地區都透過公開教師名冊等措施，防止性罪犯從事兒童教育工作，只有香港教育官僚墨守成規，簡直豈有此理。○六年至舊年，本港發生一百多宗涉及教師嘅風化案，當中九成喺涉案教師任教嘅學校發生，可見問題有幾嚴重。正如上述調查顯示，三成九受訪者狠批教育局罔顧學生福祉；三成六認為監管無與時並進；近兩成人直指監管放任自流。
今時今日，學校愈來愈政治化，本來已經烏煙瘴氣，加上淫師橫行無忌，學生安全更加無保障。本報舊年揭發問題，申訴署介入調查，是非黑白已經好清楚，如果當局仲唔識得改善，咁就真係冥頑不靈喇。總而言之，民意昭昭不可違，公開註冊教師資料勢在必行，絕對唔容許教育局繼續耍太極。